Page 318 - alberto moravia_Макет 1

Alberto Moravia

Onlar әtraf kәndlәrә, bәzәn isә Frazinon, Terraçina vә ya
Neapola gedir, bu zaman evdә gecәlәmirdilәr. Hәr sәfәrdәn
sonra hiss edirdim ki, Rozetta Klorindoya daha çox bağlanıb.
Get-gedә qızım daha çox gerilәyir, tәravәtini itirirdi. Әn cüzi
dәyişiklik belә, mәnim diqqәtli gözlәrimdәn yayına bilmәzdi.
Artıq Romaya qayıtmaq barәdә danışmırdıq, hәm dә müttәfiqlәr
hәlә şәhәri azad etmәmişdilәr. Amma Klorindo bizә eyhamla
bildirirdi ki, müttәfiq qoşunlar Romaya girәndәn sonra da, biz
Fondidәn dәrhal çıxıb gedә bilmәyәcәyik. Roma hәrbi zona
elan edilәcәk, oraya getmәk üçün, Allah bilir, neçә yerdәn
icazә almalı olacaqdıq. Bir sözlә, almanların geriyә çәkildiyi
ilk günlәrdә xәyalımızda canlandırdığımız parlaq gәlәcәyin
başının üstünü qara buludlar almışdı. Bunun sәbәbkarı Rozetta,
bir dә Klorindo idi. Özüm dә bilmirdim, Romaya, әvvәlki
hәyatıma qayıtmaq istәyirәm, ya yox. Çünki bu, әvvәlki hәyat
olmayacaqdı – biz artıq çox dәyişmişdik. Portağal ağaclarının
arasındakı o kiçik evdә keçirdiymiz günlәri xatırlayanda
dәhşәtә gәlirәm – bu, bәlkә dә, hәyatımın әn ağır günlәri idi:
bilirdim ki, Rozetta Klorindoyla sevişir, amma dilim gödәk
idi, onlara heç nә deyә bilmirdim. Hә, bunu ehtimal etmirdim,
mәhz bilirdim, çünki hәr şey gözümün qabağında baş verirdi.
Mәsәlәn, bәzәn biz yataqda olanda, evin qarşısındakı taladan
tanış fit sәsi eşidilir, Rozetta dәrhal yerindәn qalxıb әynini
geyinmәyә başlayırdı.
– Gecәnin bu vaxtı hara gedirsәn? – acıqlı-acıqlı soruşurdum, – de
görüm, hara gedirsәn?
Amma ondan cavab ala bilmirdim. O, tәlәm-tәlәsik paltarını
geyib çölә qaçırdı; bu zaman sifәtindә ehtiraslı, qulağı sәsdә
olan adamlarsayağı gәrgin bir ifadә olurdu. Lenoladan qayıdanda
da üzündә mәhz belә bir ifadә vardı. Onda başa düşdüm ki,
bu, әvvәlki Rozetta deyil vә bir daha әvvәlki Rozetta olmayacaq.
İş o yerә çatdı ki, bir dәfә Klorindo bizim samanlıqda gecәlәdi.
Әminәm ki, bu, o idi – Klorindo. Gecәyarısı Rozettanın
çarpayısının cırıltısına oyandım. Pıçıltı sәsi eşitdim. Samanlıqda

318