Page 105 - alberto moravia_Макет 1

Çoçara

Burada yaşadığımız müddәtdә mәni dәli elәyәn bir mәsәlә
dә vardı. Darısqallığı nәzәrdә tuturam. Qaldığımız yerin
darısqallığı Fondinin geniş mәnzәrәlәri ilә müqayisәdә lap
dözülmәz idi. Sant-Yeufemiyadan Fondi vadisinә gözәl bir
mәnzәrә açılırdı. Fondi başdan-başa portağal ağacları ilә
örtülmüşdü, adda-budda ağacların arasında evlәrin damı
ağarırdı. Sağ tәrәfdә, Sperlonqanın olduğu yerdә dәnizin bir
hissәsi görünürdü, bilirdik ki, dәnizdә “Pontsa” adlı ada var.
Hava yaxşı olanda, adanı gözlә görmәk dә olurdu. Ada
ingilislәrin әlindәydi, demәli, nicatımız elә dә uzaqda deyildi.
Әtrafımızda bu qәdәr geniş mәnzәrәnin olmasına baxmayaraq,
dağın döşündә yaşamağa davam edirdik. Mәkan o qәdәr dar
idi ki, adamın ürәyi sıxılırdı, cәmisi bir neçә addımdan sonra,
geriyә dönmәli olurdun. Biz yağışdan-tufandan ağac budağında
daldalanan quşlara bәnzәyirdik, isti diyarlara uçub gedәcәyimiz
günün hәsrәti ilә yaşayırdıq.
Sant-Yeufemiyaya gәlәndәn sonra Festalar bizi bir neçә
dәfә nahara dәvәt etdilәr, ancaq get-gedә bizdәn soyudular vә
bir daha evlәrinә çağırmadılar. Filippo qayıtdı ki, bәs ailәsi
var, hәr şeydәn әvvәl evdәkilәrin qarnını doyurmaq barәdә
düşünmәlidir. Xoşbәxtlikdәn, bir neçә gün sonra Tommazino
vadidәn gәldi. O, belinә çoxlu paket vә çamadan yüklәnmiş
bir uzunqulaq gәtirmişdi. Bütün bunları birgә tutduğumuz
siyahı üzrә, Fondinin müxtәlif yerlәrindәn toplamışdı. Allah
heç kimә göstәrmәsin – dağın başında, yad adamların arasında
tәk qalmışdıq, cibimizdәki pullar, az qala, bütün dәyәrini
itirmişdi. Başına gәlmәyәn bilmәz, müharibә zamanı, bir parça
çörәyә möhtac olduğumuz bir vaxtda Tommazinonun gәlişi
bizi o qәdәr sevindirmişdi ki! Bunu izah etmәk çox çәtindir.
Şәhәrdә yaşayanlara danışmaq asandır – dükanlardan ürәyin
istәyәn hәr şeyi tapa bilirsәn. Ona görә dә, mәnә elә gәlir ki,
içәrisi müxtәlif mallarla dolu olan dükanlar tәbiәt hadisәsidir –
mövsümlәrin dәyişmәsi kimi, günәş vә yağış, gecә vә gündüz

105