Page 95 - Tarey Vesos_Макет 1

Buz qəsr
– Afәrin.
Tәklikdә qalan kimi vicdan әzabı çәkdi. Valideynlәri bu
xәbәri eşidәndә elә sevindilәr ki, hәtta Siss bundan yüngülcә
tәsirlәndi.
Bazar günü mәktәblilәr toplaşıb dәstәlәndilәr, hay-küylә gölә
istiqamәt aldılar. Günәşli vә şaxtalı bir sәhәr idi. Qarın üstü
buzluydu – xizәk sürmәk üçün bundan yaxşısını arzulamaq
mümkün deyildi. Hamı şәlalәyә baxmağa tәlәsirdi. Sissin onlarla
birlikdә olmağına sevinirdilәr. Bu ümumi sevgini Siss dә hiss
elәyirdi, odur ki, daha yüngül vә sәrbәst idi, elә xizәklәri dә tәzә
yağan qarın örtdüyü buzun üstüylә rahat vә sәrbәst sürüşürdü.
Hәr şey öz axarıyla gedirdi, amma bununla yanaşı, elә bil
nәsә yerindә deyildi.
Onlar şәlalәdәn azca aşağı – çay tәrәfә istiqamәt aldılar.
Burada axın rәvan idi, çayı buz örtmüşdü, istәsәn, o biri sahilә dә
adlayıb keçә bilәrdin. Sakitlikdә şәlalәnin uğultusu eşidilirdi.
Onlar yuxarı qalxdılar.
Qış uzunu hәrәsi bir-iki dәfә buz qәsrdә olmuşdu, odur ki,
hәlә dә hәmin әzәmәti vә sehriylә yerindә dayanıb-duran bu
möhtәşәmliyә baxanda heyrәtdәn donub-qalmadılar. Mart günәşi
artıq çoxdan ona baş çәkmişdi, işıq zolaqları buzun qar dәymәyәn
parlaq layları üstündә oynayırdı.
Bütün bu müddәt әrzindә Siss bir an belә yadlarından çıxmasa
da, hәmin o tәhlükәli mövzuya bir kәlmәylә dә toxunmadılar.
Sissә әminlik hissi gәtirәn vә әzab verәn dә elә bu idi. Bu yerlәri
görәndә yaddan çıxmayan hәmin gecә onunla qәsr arasında
yaranmış sıx bağlantını yenidәn canında hiss elәdi vә dәrin
çaşqınlıq hissi keçirdi. Yol yoldaşlarından ayrılıb tәk qalmaq
istәdi.
Uşaqlar qәsrә doyunca baxmış, şәlalәnin uğultusuna qulaq
asmışdılar – birazdan bu sәs daha da güclәnәcәkdi. Lәngimәdәn
yollarına davam etmәyә hazırlaşırdılar.
Amma Siss tәrpәnmәdi. Bax elә qorxduqları da bu idi. Sanki
hiss etmişdilәr ki, hansısa an Siss yenidәn özünә qapanacaq.
Onlar da dayanıb gözlәdilәr.

95