Page 326 - Tarey Vesos_Макет 1

Tarey Vesos
Burada. Hәmin yer buradı. Sahildәn, hamının gözündәn uzaq bir
yer. Artıq ona mane olan yox idi. Mәhz burada. Fikirlәşmәmәlidi.
Yaş avarları qayığın içinә qoydu. Avarlar günәşdәn parlayırdı.
Qayıq bir az da irәli sürüşüb, nәhayәt, donub-qaldı. Suya:
– Bax belә, Xeqe, – dedi.
Bu sözü ucadan vә qәtiyyәtlә demәk istәdi, amma alınmadı.
Әvәzindә planını maneәsiz-filansız gerçәklәşdirәcәkdi. Lәng,
sanki özgә әllәrlә qayığın әn çürümüş yerini axtarıb tapdı. Ayağı
da elә bil özünün deyildi. Bununla belә, bütün ağırlığını çürük
taxtanın üstünә yıxdı vә qayıq dabanına rahatca tәslim oldu.
Mattis ilan vurmuş kimi ayağını çәkdi. Su qayığın içinә doldu.
Bütün bәdәni әsirdi. Avarları qoltuğunun altına sıxıb oturdu.
Bәdәnim haradadı? – düşündü. Bunu kim elәdi?
Yox, yox, bu, mәn deyilәm. Amma nәhayәt, indi nәyin sәhv,
nәyin düz olduğu aydınlaşacaq.
Qayıq aman vermәdәn suyla dolurdu. Deşiklәrlә dolu bu
çürümüş qayıq özü dә hiss etmәdәn altından sürüşüb çıxdı.
Özünә gәlmәyә macal tapmamış, avarlardan asılıb qaldı. İstәdiyi
kimi.
Su soyuq deyildi, yayın istisi hәlә dә canındaydı. Amma
qapqara dәrinlik ayaqlarına ilişәndә sәksәndi. Suyun üzәrindә
qalan yalnız başıydı. O, sahilә çıxmaq üçün ayaqları vә әllәriylә
çapalamağa başladı. Bu, onun planına uyğun idi. Avarları
qoltuğundan buraxmadan var gücüylә çapalaya-çapalaya sakitcә
üzürdü. Su güzgü kimiydi – üzәrindә üstünә sәrilmiş göy dә, yer
dә әks olunmuşdu.
Mattis eyni vaxtda hәm capalayır, hәm dә üzürdü. Gözlәri
qәrb tәrәfdәki tәpәlәrdәn baxan bir nöqtәyә zillәnmişdi. Әn
yaxın nöqtәyә. Bu da onun planına daxil idi – bütün gücü
tükәnәnә qәdәr çapalamaq.
Az sonra suyun üzәriylә bir lәpә qaçdı, elә bil kimsә onu
üfürüb şişirmişdi. Suyun üzәriylә gah bu, gah da o biri tәrәfdәn
kölgә sürüşüb keçdi. Amma Mattis bunu görmәdi, o, zorla nәfәs
ala-ala dәlicәsinә әlinә, ayağına güc vermişdi. Bu zaman kürәyinin
vә üfüqün arxasından lay-lay buludlar qalxdı – Mattis onu da
görmәdi.
326