Page 202 - Tarey Vesos_Макет 1

Tarey Vesos
15

Sәhәrә qәdәr birtәhәr sәbir elәyib hәmin yerә gәlәndә
gümanında yanılmadığını gördü. Öz işarәlәrinin yanında quş
dimdiyi ilә yazılmış yeni nöqtәlәr vә cizgilәr tapdı.
Mattis buna hazır olsa da, tәәssüratı elә güclüydü ki, daşın
üstә oturmalı oldu.
Demәk, onların arasında, hәqiqәtәn dә, bağlantı var.
Görәn, bu quş öz gözәl dilindә ona nә deyirdi?
Mattis qәti әmin idi, quş ona möhkәm dostluq tәklif edirdi.
Nöqtә, nöqtә, nöqtә. Bu işarәlәr әbәdi dostluğa çağırış idi.
Mattis taxtanı götürüb onun da quşla hәmrәy olduğunu
tәntәnәylә cızdı.
Quş dilindә yazmaq çәtin deyildi. Onlar bir-birlәriylә çox
görüşmәliydilәr. Yerdә quş caynaqlarının da yeni izlәri әmәlә
gәlmişdi. Mattis qәrara aldı ki, bu, rәqs izlәrinә oxşayır. Tәnha
quş burada rәqs elәmişdi.
Amma pusquda dayanıb onun rәqsinә baxmaq düzgün deyildi.
Mattis yan-yörәsinә göz gәzdirib ucadan:
– Belә-belә işlәr, – dedi.
Bu sözlәri adi insan dilindә dediyindәn sәsi kobud vә bayağı
çıxdı. İndi yalnız quş dilindә danışmaq istәyirdi – hәtta evdә
Xeqeylә dә. Yәqin, onda bacısı da indi ona qaranlıq qalan şeylәri
anlayar. Amma Mattisin buna cürәti çatmazdı, bunun nәylә
qurtaracağını, qaranlıq da olsa, tәsәvvür elәyәrdi. Onda mәni
sadәcә evdәn çıxmağa qoymaz. İnsanlar bütün dillәrin әn gözәli
barәdә eşitmәk belә istәmirlәr, ona nifrәt elәyirlәr.
İçinә dolan sevinc hissiylә әyilib yenә nәsә yazdı. O, öz
yazılarıyla qurumuş gölmәçәni tamam doldura bilәrdi, amma
belә elәmәk olmazdı, valdşnepә dә mәktub üçün yer saxlamalıydı.
Hәr gün ikisi dә yüngüllüklә, sanki rәqs edә-edә bura tәlәsәcәk,
ürәklәrindә olanları yazacaq.
Mattisin bu kәşfinin üçüncü, dördüncü günü dә hәr şey
tәkrarlandı. Xeqe onun nә sәbәbә belә tez-tez meşәyә getmәsiylә
maraqlandı.

202