Page 405 - Sholom_Aleyhem_Макет 1

Südçü Tevye

– Elә bu? – deyirәm. – Hansı әmәllәrimә görә? Qarşınızda
nә günah işlәtmişәm?
– Sәni mәn yox, quberniya sürgün edir.
– Quberniya? – soruşuram. – Mәn ona neylәmişәm?
– Tәk sәni yox, hәm dә tәkcә buradan yox, әtrafdakı bütün
kәndlәrdәn: Zlodeyevka, Qrabilovka, Kostolomovka, hәtta Ana-
tovkadan da! Әvvәllәr bura qәsәbә sayılırdı... İndi kәnd olur,
oradan bütün sizinkilәri qovurlar. ..
– Qәssab Leyzer-Volfu da? Naftole-Gerşi dә? Qәssabı da?
Ravvini dә?
– Hamını! – cavab verir vә әlini yellәyir.
Ürәyim bir az sakitlәşdi: hәr halda, dәrd tәkcә mәnim yox,
hamının dәrdidir – bu da tәskinliyin yarısıdır.
– Cәnab uryadnik, bilirsәn ki, mәn burada sәndәn dә әvvәl
yaşayıram? Bu torpaqda rәhmәtlik atam, babam, nәnәm ömür
sürüb, Allah onlara rәhmәt elәsin…
Tәnbәllik elәmәyib bütün şәcәrәmi sadaladım, hamının adını
bir-bir çәkdim, kimin sağ olduğunu, kimin öldüyünü söylәdim...
Diqqәtlә dinlәdi, sözümü bitirәndәn sonra dedi:
– Doğrudan da, Tevl, qәribә adamsan, söhbәtin dә çox
maraqlıdır! Sәnin nәnәndәn, babandan mәnә nә? – deyir. – Allah
onlara rәhmәt elәsin! Sәn isә Tevl, şәlә-külәni yığışdırıb sürüş
bir baş Berdiçevә!
Bu sözlәr mәni özümdәn çıxartdı: “xoş” xәbәrlә gәlmәyi az
imiş, hәlә bir әlә dә salır: “Sürüş birbaş Berdiçevә!” Qәrara
aldım ki, heç olmasa, ürәyimdәkilәri ona deyim!
– Cәnab rәis! – dillәnirәm. – Neçә vaxtdır rәisimizsәn. Heç
eşitmisәn ki, qonşulardan kimsә mәndәn şikayәtçi olsun? Desin
ki, Tevye oğurluq edib vә ya kimisә aldadıb? Kәndlilәrdәn xәbәr
al, onlarla canbir qәlbdә yaşamışam. Cәnab rәis, neçә dәfә sәnin
yanına gәlib xahiş etmişәm ki, onları incitmәyәsәn?
Deyәsәn, sözlәrim xoşuna gәlmәdi. Qalxdı, sönmüş papirosu
ovcunda әzib atdı vә dedi:
– Sәninlә söz gülәşdirmәyә, boş-boş söhbәtlәrә qulaq asmağa
vaxtım yoxdur. Kağız gәlib, göstәriş belәdir ki, köçmәlisәn! Gәl
qol çәk! Yola düşmәk üçün sәnә üç gün vaxt verirәm! Hәr şeyi
sat vә xoş gәldin!

405