Page 380 - Sholom_Aleyhem_Макет 1

Şolom Aleyxem

Hә, Allaha şükür, Tevye sağ-salamatdır vә mәn bunun
şahidiyәm. Kitabda deyildiyi kimi: “Dağ dağa rast gәlmәsә dә,
insan insana rast gәlә bilәr..” Mәnә elә baxırsınız ki, guya
tanımırsınız. Mәnәm dә, köhnә dostunuz Tevye, tәzә libasda
dayanmışam hüzurunuzda. Bu, hәmin başabәla Tevyedir, necә
vardı, elә dә qalıb, heç dәyişmәyib, ancaq şәnbә günü bayram
libası geyinәndә lәyaqәtli görkәm alır, varlıya bәnzәyir. Çünki
uzaq sәfәrә, adam arasına çıxırsan, başqa cür olmaz. Fәlәstinә
getmәk zarafatdır? Yәqin, tәәccüblәnirsiniz, hәyatı boyu yağ-
pendir satan Tevye kimi balaca adamda bu hәvәs hardan yaranıb?
Axı ancaq milyonçu Brodski kimi adam ahıl çağında belә uzaq
sәfәrә getmәyi özünә rәva bilәr! Başdan-ayağa tapmacadır, pan
Şolom Aleyxem, inanın, hәr şey ovucun içi kimi aydındır! Zәhmәt
olmasa, çamadanı kәnara çәkin, yanınızda oturub sizә әhvalat
danışım. Qulaq asın, görün Allah nәyә qadirdir?
Әvvәlcә, mәlumunuz olsun ki, sizdәn uzaq, dul qalmışam.
Qoldam ölüb, Allah ona rәhmәt elәsin. Sadә, qәlbi tәmiz, çox
mömin qadın idi.
İndi o dünyada balalarına qovuşub, uşaqların ucbatından çox
әzablara qatlaşdı. Övladlarımızın pәrәn-pәrәn düşmәsinә tab
gәtirә bilmәyib bu dünyadan köçdü. Son vaxtlar “İlahi, keç
günahımdan, bu, nә hәyatdır? – deyirdi, – uşaqlarsız yaşamağın
nә mәnası? Hәtta inәk dә buzovdan ayrı düşәndә darıxır...”
Qolda hәmişә belә deyib göz yaşı axıdırdı. Arvad günü-
gündәn şam kimi әriyirdi, ona yazığım gәlirdi, nәhayәt, dözmәyib
ürәyimdәn keçәnlәri söylәdim:
– Canım Qolda, balaların yanımızda qalmasına, ya da isti yu-
vadan uçub getmәsinә biz qәrar vermirik. Hәr şey böyük, rәhmli,
qüdrәtli Allahın әlindәdir… Bәzәn xoşbәxtlik әvәzinә Allah sәni
elә bir günә qoyur ki, bunu heç düşmәnә dә rәva görmәzsәn!..
Ancaq Qolda qadındır... Görün nә deyir: “Günah işlәdirsәn,
Tevye! Günah elәmәk olmaz...”
Bu da verdiyi cavab! Bәyәm nәsә pis bir şey dedim? Elә
bilirsiniz, Allaha qarşı çıxıram? Qadir Allah bu bәnzәrsiz dünyanı

380