Page 312 - Sholom_Aleyhem_Макет 1

Şolom Aleyxem

– İnanın! – Menaxem-Mendl dedi. – Allah qoysa, borcunuzu
qaytaracağam, reb Tevye, vicdanıma, lәyaqәtimә and içirәm!
Ümidvaram, bu işdәn xeyir görәcәksiniz!
– Amin, – dedim. – Sizә dә bunu arzulayıram. Allah xeyir
versin. Ancaq anlaya bilmirәm, pişik Vaska çayın o biri sahilinә
necә keçәcәk? Başa düşürsәn?.. Mәn burada, sәn o tayda... Pul,
bilirsәn dә, çox şirin şeydir... İncimә, pis niyyәtlә söylәmirәm.
İbrahim peyğәmbәrimizin tәbirincә desәk: “Zәhmәt çәkәrsәn,
bәhrәsini görәrsәn”. Gәl әvvәlcәdәn şәrtlәşәk ki, xırmanda
davamız düşmәsin...
– Hә! – dedi. – Bәlkә, dilimdәn iltizam verim? Buyurun,
mәmnuniyyәtlә!
– Hәlә ehtiyac yoxdur! – dedim. – Bu işә bir qәdәr fәrqli
yanaşmaq lazımdır. Әgәr mәni mәhv etmәk istәyirsәnsә, iltizamın
nә xeyri? Kağız dadıma çatacaq? Talmutda deyilir: “Siçan
oğurladığını yuvasına daşıyır...” Veksel sadәcә kağız parçasıdır...
Hәr nә desәn ola bilәr!
– Mәnә inanın! – yenә tәkrar etdi. – Şәrәfimә and içirәm,
reb Tevye. Yalan danışıramsa, Allahın qәzәbinә gәlim! Reb
Tevye, sizi aldatmaq fikrim yoxdur, Allah elәmәsin! Yalnız bir
şeyi fikirlәşirәm: qazancı vicdanla vә halallıqla bölәk, yәni
bәrabәr, yarısı sizә, yarısı mәnә: yüz mәnә, yüz sizә, iki yüz
mәnә, iki yüz sizә, üç yüz mәnә, üç yüz sizә, dörd yüz mәnә,
dörd yüz sizә, min mәnә, min sizә...
Nә isә, pulları sandıqdan çıxarıb üç dәfә saydım, әllәrim
әsirdi, qarını çağırdım ki, o da saysın, Menaxem-Mendli bir daha
başa saldım ki, bu pulları qanım hesabına qazanmışam. Әsginasları
verdim, daha doğrusu, qonağın yan cibinә qoyub tikdim ki, Allah
elәmәmiş, birdәn yolda oğurlayarlar. Razılaşdıq ki, gәlәn hәftәdәn
gec olmamaq şәrti ilә, hәr şeyi tәfsilatı ilә yazıb mәnә göndәrәcәk.
Nә isә, әziz adamlar kimi öpüşüb-görüşdük vә vidalaşdıq.
O getdi, tәk qalandan sonra ağlıma müxtәlif fikirlәr gәlirdi,
sanki yuxu görürdüm, – bir tәsәllim vardı ki, yuxular ürәkaçan
idi, bitmәsini istәmirdim. Gözümün önündә şәhәrin mәrkәzindә
damı dәmirlә örtülmüş böyük malikanә, içi ağzına qәdәr dolu
anbarlar canlanırdı…

312