Page 305 - Sholom_Aleyhem_Макет 1

Südçü Tevye

bir ricam var: kitabda mәnim barәmdә yazmayın. Әgәr yazsanız,
heç olmazsa, adımı çәkmәyin.
Sağ-salamat vә xoşbәxt olun!

Xülya

“Niyyәtin hara, mәnzilin ora” – Müqәddәs kitabda belә
yazılıb. Reb Şolom Aleyxem, bunun mәnasını sizә izah etmәyә
lüzum yoxdur. Amma bizdә belә bir mәsәl var: “Çapan ata
qırmanc, ağıllı insana isә mәslәhәt vacibdir”. Kimi nәzәrdә
tuturam? Özümü! Әgәr ağlım olsaydı vә yaxın dostumun yanına
gәlib hәr şeyi ona danışsaydım, yәqin, durduğum yerdә işә
düşmәzdim! Lakin Allah adamı cәzalandırmaq istәyirsә, әvvәlcә
onun ağlını әlindәn alır. Düşünürәm: “Tevye, ay eşşәk, bir düşün!
Axı deyilәnә görә, ağılsız adam deyilsәn, bәs necә razı oldun ki,
sәni barmaqlarına dolayıb әlә saldılar? Özü dә bu cür, axmaqcasına!
Nәyin çatmırdı, hә? Mәsәlәn, indi, az da olsa, qazancın var. Axı
sәnin süd mәhsulların hәr yerdә – Boyberikdә, Yequpetsdә,
harada desәn, ad çıxarıb... Yaxşı olardı ki, pullara ütü çәkib
sandığın dibindә saxlayaydın vә kimsә xәbәr tutmazdı! Düz sözә
nә deyәsәn? Kimin nә vecinә idi ki, toz-torpaq içindә sürünәn
Tevyenin dәrdi var, arvad-uşağı yemәyә çörәk tapmır, gündә üç
dәfә acından ölüb-dirilir? Sonra Allah rәhmә gәlib nәzәrlәrini
Tevyeyә tәrәf çevirdi, onu birdәn-birә xoşbәxt elәdi. Kişi dirçәldi,
qara günü üçün xırda-para pul yığanda hamı ondan danışmağa
başladı vә indi kasıb kәndlini hörmәtlә “reb Tevye” çağırırlar!
Bu, zarafat deyil! Tevyenin gözlәnilmәdәn saysız-hesabsız dostları
peyda oldu! Müqәddәs kitabda yazıldığı kimi: “Hamı sevinc
içindә, hamı gülәrüz”. Nә isә, “Allahın altında dost tapmaq
çәtindir, pulun olanda isә minlәrlә dost peyda olur...” Hamısı da
mәslәhәt vermәkdә ustadır: biri deyir parça dükanı aç, digәri
әrzaq mağazası, bәzisi israrla mәslәhәt görür ki, ev, malikanә,
meşә sahәsi alım, çoxları da taxıl ticarәtinә qoşulmağı tәklif
edir...

305