Page 276 - Sholom_Aleyhem_Макет 1

Şolom Aleyxem

– Nә? Evlisiniz? Tәbriklәr! – Arkadi yerindәn azacıq qalxdı.
– Evli idim, – Bronzentoler cavab verdi. – narahat olmayın,
ayrılmışam. Nә isә... Sonra dost-tanış mәni dilә tutmağa başladı.
“Bu milyonlar nәyinә gәrәkdir axı? Öz işinlә mәşğul olsan
yaxşıdır! Az qazan, hәmişә qazan! Bu pana niyә baş qoşmusan?
Kim bilir, hansı yuvanın quşudur! Bәlkә, heç pan deyil?” Nә isә,
dedi-qodunun ardı-arası kәsilmirdi.
Arvadım da mәni düz yola qaytarmağa çalışırdı. Ona dedim:
“Ay ağılsız, deyilәnlәrә fikir vermә! Paxıllıq çәkirlәr. Bizim
böyük sәrvәtә sahib olacağımızdan qorxurlar, bunu hәzm edә
bilmirlәr!” Arvadla dil tapmaq qeyri-mümkündür! Tutuquşu kimi
dediyindәn әl çәkmir. “Mәnә belә xoşbәxtlik lazım deyil. Özünә
qismәt olsun! Gәl boşanaq, yollarımızı ayıraq!” Başa düşdüm ki,
onu yola gәtirmәk çәtin olacaq. Ayrıldıq. Başım müsibәtlәr çәkdi,
xәcalәtimdәn dabanıma tüpürüb qaçdım, Yequpetskә köçdüm.
Pan dostum ilә yenә dә mәsrәflәri ödәyә bilәcәk adamlar
axtarmağa başladıq. Hәr halda, Yequpetsk böyük şәhәrdir, iri
müәssisәlәri, varlıları, böyük pullar qazanmaq eşqi ilә yaşayan
insanları var.
Panı yaxşı mehmanxanalardan birinә yerlәşdirdim, özümә
isә bu çardağı kirayәlәdim, necә deyәrlәr, Allaha yaxın olum.
Hәr sәhәr әsamı götürüb birjaya gedirәm, ora hәmişә qәlәbәlik
olur, lazımi adamlarla tanışlıq qururam.
Amma ümid var ki, sәhmdar cәmiyyәt tәsis edәk. Bu, o
demәkdir ki, bir neçә adamın sәhmlәrinin birlәşmәsindәn lazımi
kapital yaranacaq. Kim nә qәdәr sәhm yatırıbsa, o qәdәr dә pay
alacaq. Әgәr payçı bu gün yüz rubl qoyubsa, sonda on min rubl,
min qoyubsa – yüz min, on minә – milyon rubl qazanacaq. İndi
tәsәvvür edin, arvadım it kimi peşman olub, dostlarını yanıma
göndәrib mәni dilә tutmağa çalışır. Onlar da hәsәd aparırlar, yәni
Moyşe Bronzentoler – adi puldәyişәn – gözlәnilmәdәn üç milyon
qazanacaq.
– Nә? Üç milyon? – Arkadi Şveytser bağırıb çarpayıdan
atıldı. – Doğrudan, üç milyon?

276