Page 213 - Sholom_Aleyhem_Макет 1

Üç dul qadın

Sevinmәyin, ideya baxımından menşeviklәrә yaxın yәhudi millәtçi
partiyası – “Bund”a üzv yazılmamışam, Tanrının gözündәn iraq,
amma yorğan altında yatanlardan da deyilәm!
Demәk belә, haqqında söhbәt açdığım bu üç oğlan hәr gün
bizә gәlir. Biri Finkel, ikincisi Bronşteyn, üçüncüsü isә Qruzevişdir.
Qapını tәpiklә açırlar, elә bil öz evlәridir, çünki bizim dul
qadınların bu oğlanlardan ötrü ürәyi gedir, әziz qonaq kimi
yuxarı başda әylәşdirirlәr, әn lәziz yemәklәri düzürlәr süfrәyә!
Öpüb gözlәrinin üstünә qoymağa, canlarını vermәyә hazırdırlar!
Bu gül balalardan biri әvvәl-axır Feygelenin nişanlısı adını
daşımağa namizәd olacaq. Daha doğrusu, hәr üçü namizәddir,
amma Feygele üçünә dә birdәn әrә gedә bilmәz axı! Mütlәq
birini seçmәlidir. İndi gәl tap görüm hansını? Bu mövzuda
danışmağa belә imkan vermirlәr! Oğlanlar özlәrini çox sәrbәst
aparır, kimsәnin rәyini soruşmurlar. Bir dә ki, kimdәn soruşsunlar?
Anadan? Ana onların nәyinә gәrәkdir? Gözәl çöhrәli qadındır,
vәssalam! Nәnәdәn? Nәnәni sayan var? Nәnә onların gözündә
evdar qadındır, vәzifәsi qonaqlara süfrә açmaq, lәziz yemәklәri
ortalığa düzmәkdir. Bir dә nәzarәt etmәlidir ki, qonaqlar ac
qalmasın, doyunca yeyib-içsinlәr... Qaldı bir nәfәr... Mәndәn heç
danışmağa dәymәz. Onlar üçün kimәm? Süfrә arxasında artıq
yer tutan adam. Bir dәfә dә olsun mәnimlә ünsiyyәtә cәhd
göstәrmәyiblәr! Yalnız “duzu verin”, “istiotu olar?”, “qәndqabını
yaxına çәkin” kimi sözlәr... Ya da kibrit soruşurlar, özü dә hәr
dәfә “xahiş edirәm” demәyi unudurlar. Elә bil lal-kardırlar,
siqareti ağızlarına qoyub tәlxәk kimi işarә edirlәr ki, yandırmağa
kibrit verim. Vәssalam! Bәzәn görürlәr ki, tәk oturmuşam, gәlib
yanımda әylәşib vә öz aralarında söhbәtә başlayırlar. Mәnimlә
kәlmә dә kәsmirlәr, özlәrini elә aparırlar ki, guya görmürlәr.
Hәtta nәzakәt xәtrinә dә mәnimlә danışmaq istәmirlәr. Onlar
üçün yoxam! Gözәgörünmәzәm! Yәqin, başa düşürsünüz, söhbәtә
birinci başlayan deyilәm, başqaları kimi yaltaqlıqla özünü gözә
soxmağı, lüzumsuz yerә kiminsә üzünә gülmәyi xoşlamıram.
Dünyaya elә bir adam gәlmәyib ki, onun qarşısında baş әyim.

213