Page 104 - anderson_Макет 1

Şervud Anderson

MÜTӘFӘKKİR

Ses Riçmondun Vaynzburqda anasıyla yaşadığı ev bir zamanlar
qәsәbәnin әn baxımlı evlәrindәn olmuşdu. Lakin Sesin gәnclik
vaxtlarında bu ev әvvәlki kimi şöhrәtli deyildi. Bank işçisi Vaytın
Bakay küçәsindә kәrpicdәn tikdirdiyi böyük evinin ad-sanı hәmin
evi kölgәdә qoymuşdu. Riçmondların malikanәsi Meyn küçәsindәn
uzaqda, kiçik bir vadidә yerlәşirdi. Tozlu yollarla cәnubdan
qәsәbәyә gәlәn fermerlәr Yarmarka meydanının әtrafını saran
qoz meşәliyinin yanından keçib-gedirdilәr. Kәnarlarında üzәrinә
reklam kağızları vurulmuş çәpәr olan Yarmarka meydanını arxada
qoyduqdan sonra vadiyә enir vә Riçmondların evinin yanından
ötüb qәsәbәyә daxil olurdular. Kәndlәrdәki kimi, Vaynzburqun
şimal vә cәnub әrazilәrinin hamısına meyvә ağacları, gilәmeyvә
kolları әkilmişdi. Ses hәr sәhәr faytonlara doluşub gilәmeyvә
yığmağa gedәn, axşamlarsa üst-başları toz içindә qәsәbәyә
qayıdan oğlanları, qızları, qadınları görürdü. Faytondan faytona
qışqırıb söz deyәn, bir-biriylә deyә-gülә kobud zarafatlar edәn
bu adamlar bәzәn Sesi әmәlli-başlı qıcıqlandırırdılar. O, tәәssüf
içindә fikirlәşirdi ki, nәyә görә bu adamlar kimi ürәkdәn gülә,
mәnasız zarafatlar edә bilmir, nәyә görә bu yolları hәr gün
yuxarı-aşağı gedib-gәlәn insanların qaynar dünyasına qatılmağı
bacarmır.
Riçmondların evi әhәngdaşından tikilmişdi vә bәzilәri evin
köhnәldiyini düşünsә dә, o, ildәn-ilә daha da gözәllәşmişdi.
Amma ötüb-keçәn vaxt evin rәnginә, az da olsa, әl gәzdirmişdi.
Uzun illәr sonra divarlar qızılı rәngә çalırdı. Damın çıxıntısı
altında qalan kölgәli yerlәrin isә axşamlar vә yaxud tutqun
günlәrdә qәhvәyi vә qara rәngә çaldığını görmәk olardı.
Bu evi Sesin babası tikdirmişdi. O, Vaynzburqdakı daş
karxanasının sahibi idi. Öldükdәn sonra bu karxana ilә birgә İәri
gölündәn on sәkkiz mil şimalda yerlәşәn digәr karxanaların
hamısı oğlu Klәrens Riçmonda – Ses Riçmondun atasına qalmışdı.
Qonşularının heyranlığını qazanan, daxilәn çılğın tәbiәtli Klәrens
Riçmond Ohayonun Toledo әyalәtindә bir qәzetçi ilә küçәdә
dava edәrkәn öldürülmüşdü. Qәzetçi ilә arasında yara nan müba -

104