Page 305 - Tarey Vesos_Макет 1

Quşlar
Amma az sonra gözünә artıq çәpәrin o biri tәrәfindә olan
daha bir muxomor sataşdı. Bu, ondan da gözәl idi. Bunu
tapdalamadı, nәsә elә bil Mattisә istilik gәldi vә o, buradan
uzaqlaşdı. İndi bilirdi ki, buralarda hәr tәrәf muxomorla doludu –
çәpәrin yanları da, tәpәciklәrin arası da, meşә dә.
Onların evlәri sanki ölümlә dövrәlәnmişdi.
Doğrudanmı hәmişә belә olub? Әvvәl nәsә bunu sezmәmişdi.
Bu muxomorlar, görәn, haradan peyda olur? Bәlkә, onlar insanların
baxışları altında yetişib böyüyür?
Düşündü ki, bәlkә, Yörgen dә elә bu dövrәnin içindә ölәcәk?
Axı o, dörd bir tәrәfdәn zәhәrlә әhatәlәnib!
Yox, yox! Mәn bunu istәmirәm!
Amma bu fikir yenidәn sanki ilan kimi beynindә süründü.
– Necә edim? – yerindәcә donub-qalmış halda tәşvişlә
özündәn soruşdu.
Mәn gәrәk nәsә edәm. Yoxsa yenә onun üstünә atılacam.
Hәr şey hәmişәki kimi yekunlaşdı, o, yenә ağıllıların mәslәhәtinә
ehtiyac duydu. Vә hәmişәki kimi, bu, Xeqe idi. Heç bir izah
vermәdәn:
– Sәnә elә gәlmir ki, bu il muxomor yaman çoxalıb? –
soruşdu.
Xeqe:
– Nәsә hiss elәmәmişәm, – dedi. – Mәncә, elә deyil, – әlavә
edib işiylә mәşğul oldu.

39

Vә sanki heç kimin zәhәrli dövrәyә alınmadığına işarә kimi
cığırda bir qız göründü.
Mattis gözlәrinә inanmadı. Bu qız ona tanış idi; yayda birlikdә
tarlada işlәmişdilәr. Öz oğlanıyla bir-birlәrini çimdiklәyәn hәmin
qız idi. Bu, möcüzәydi – belә ağır dәqiqәlәrdә qız cığırla onların
evinә tәrәf düşürdü.
Adacıqdakı macәralarını xatırlayıb düşündü ki, bu qız onun
yanına gәlib.
305