Page 90 - anderson_Макет 1

Şervud Anderson

MACӘRA

O vaxt Corc Villard hәlә yeniyetmә bir oğlan idi. Elis
Hindmanın isә iyirmi yeddi yaşı vardı. Vә bu iyirmi yeddi yaşlı
qadın bütün ömrünü Vaynzburqda yaşamışdı. O, Vinneyin parça
mağazasında işlәyir vә ikinci dәfә әrә getmiş anası ilә birgә
ömür sürürdü.
Elisin ögey atası içki düşkünü olan fayton rәngsazı idi. Onun
da nә zamansa qәlәmә alınacaq maraqlı bir hәyat hekayәsi var.
İyirmi yeddi yaşlı Elis hündürboylu, incә bir qız idi. Onun
başı bir qәdәr böyük görünürdü vә bu, bәdәninin gözәlliyinә
azca kölgә salırdı. Çiyinlәri bir az qabağa çıxmışdı. Saçları kimi
gözlәri dә qәhvәyi rәngә çalırdı. Tәbiәtәn çox sakit qız idi,
amma onun bu sakit görkәminin arxasında qәribә bir çılğınlıq
gizlәnirdi.
Elis işlәmәyә başlamazdan әvvәl, hәlә on altı yaşı olanda
cavan bir oğlanla görüşürdü. Ned Kari adlı bu oğlan yaşca
Elisdәn böyük idi. Corc Villard kimi o da “Vaynzburq İql”
qәzetindә işlәyirdi vә artıq neçә vaxt idi ki, hәr axşam Elislә
görüşә gedirdi. Onlar şәhәr küçәlәri boyunca ağaclar altında
gәzişәr vә gәlәcәk hәyatlarından, qurduqları xәyallardan danışardılar.
Elis o vaxtlar çox gözәl idi vә bir dәfә Ned onu qolları arasına
alaraq öpmüşdü. Ned hәyәcanlanmış, düşünmәdәn nәsә qarma-
qarışıq bir-iki kәlmә söz dә demişdi. Cansıxıcı hәyatına xoş bir
yenilik gәldiyini hiss edәn Elis dә hәyәcanını Ned kimi öz sözlәri
ilә büruzә vermişdi. O, hәmin an bütün utancaqlığını, bütün
çәkingәnliyini özündәn uzaqlaşdırıb hisslәrinә tәslim olmuşdu.
Elisin ömrünün on altıncı payızında, o payızın axırlarında
Ned Kari şәhәr qәzetlәrinin birindә özünә iş tapmaq, mәnsәb
qazanmaq üçün Klivlendә getmәyi qәrara aldı. O vaxt Elis dә
onunla getmәk istәdi. Elis sәsi titrәyә-titrәyә fikrindәn keçәni
ona da dedi:
– Mәn dә özümә bir iş taparam. Sәn dә, mәn dә – ikimiz dә
işlәyәrik. Sәni artıq әziyyәtә salmaq, sәnә yük olmaq istәmirәm.
Biz indi evlәnmәsәk dә olar. Bunsuz da biz bir yerdә yaşaya, bir
yerdә ola bilәrik. Eyni evdә qalsaq da, heç kim bizә heç nә
demәyәcәk. Şәhәrdә, onsuz da, bizi tanıyan olmayacaq.

90