Page 20 - "Dünya yuxutək əriyir..."

Şeirlər

Nә bilim, bәlkә dә, öz hәyatımı
Bu kiçik fırçamla çәkib rәnglәdim?
O qәdәr rәnglәyib boyaq vurdum ki,
Aldadıb çaşdırdım öz taleyimi?
Bәlkә, doğrudan da, mәni görmәyi
Nahaqdan hamıya yasaq elәdim?
Yәni belәdimi? Varmı bir ürәk,
Hәm doğrudan sevsin, hәm dә әbәdi?..
Budur, yenә tәkәm… qorxuram amma,
Qalam bu tәkliklә yenә baş-başa.
Guya eşitmirәm ağlar qәlbimi,
Guya bilәrәkdәn dönmürәm daşa.
Yenә dә yalqızam… әlacım ancaq,
Qәmin qılığına girmәkdi, mәncә.
Ya da pәncәrәyә ağ kәtan qoyub
Sonsuz rәnglәmәkdi, dan sökülüncә...

20 / 21