Page 8 - anderson_Макет 1

1899-cu ildә ABŞ qoşunları Kubanı tәrk etdikdәn sonra
Ş.Anderson Klayda qayıdıb kәnd tәsәrrüfatı ilә mәşğul olmağa
başlayır. Tәhsilini bitirmәk istәyi onu yenә rahat buraxmır. 1899-cu
ilin sentyabrında Sprinqfildә gәlir vә Vittenberq ali mәktәbinә
daxil olur. 1900-cü ilin yazında buranı bitirir vә yayda Çikaqoya
köçür. Dostunun kömәyi ilә reklam şirkәtindә işә düzәlir.
1904-cü ildә Ohayodan olan zәngin bir biznesmenin qızı
Kornelia Prett Leyn ilә ailә hәyatı qurur. İki il sonra onlar
Klivlendә köçürlәr. Anderson burada satış meneceri kimi işlәmәyә
başlayır. Tezliklә bu işlә bağlı bәzi ciddi problemlәr ortaya çıxır.
Keyfiyyәtinә cavabdeh olduğu bәzi malların qüsurlu olması
sәbәbindәn ona çoxlu mәktublar gәlir vә nәticәdә ciddi әsәb
sarsıntıları keçirәn Anderson 1907-ci ildә şirkәtdәki işindәn
ayrılaraq, hәyat yoldaşı ilә birgә Ohayonun Eliria әyalәtinә köçür.
Burada yeni bir mağaza açıb biznesә başlayır. Eliriadakı ilk illәr
onun üçün xoşbәxt vә uğurlu olur. İlk övladından sonra daha iki
uşağı dünyaya gәlir. Köhnә illәrin dә tәcrübәsindәn istifadә
edәrәk biznesini daha da genişlәndirir vә “Anderson” boya
şirkәtini yaradır.
Göründüyü kimi, bu illәr әrzindә gәlәcәyin tanınmış yazıçısı
әdәbiyyat alәmi ilә yaxın tәmasda olmayıb.
Lakin onun hәyatı sonacan bu cür davam etmir. Biznes
dünyasının qalmaqallarına başı qarışan Şervud Anderson günlәrin
birindә öz ofisinә gәlir vә katibәsinә nәyisә diktә etdiyi vaxt
qәfildәn duruxaraq sözünü yarımçıq kәsir. “Deyәsәn, ayaqlarım
yaşdı, özü dә getdikcә lap islanır”, – deyә mızıldanır vә hәyat
yoldaşına qısa bir mәktub yazıb qoyaraq ofisindәn çıxır. Hәmin
gün hara getdiyi mәlum olmayan yazıçı axşam da evinә qayıtmır.
Qarşıdakı dörd gün әrzindә ondan heç bir xәbәr çıxmır vә
dördüncü günün sonunda o, saçları dağınıq halda pәrişan görkәmlә
yol kәnarındakı aptekә girәrәk satıcıdan öz kimliyini soruşur.
Cibindәki qeyd dәftәrindәn qohumlarının telefon nömrәlәrini
tapan әczaçı onu ailәsi ilә görüşdürmәyә nail olur. Başına gәlәn
bu qәribә hadisә barәdә dövrün bәzi qәzetlәri müxtәlif xәbәrlәr
yayır, hәkimlәr Andersona fәrqli diaqnozlar qoyurlar.

8