Page 65 - "Yeni söz"

Aysel Novruz. Şeirlər
Qadın evə gəldi.
Çantasından çoxlu iş,
dəftər-kitab,
yorğunluq,
səbəbsiz kədər,
boş ürək çıxardı
qoydu masaya.
Sonra
evdəki bişməmiş yeməyi,
oğlunun ağrıyan boğazını qoydu.
Bir azdan
bütün bunlardan bir sabah hazırlamalıydı:
ümidli,
işıqlı,
xoşbəxt bir sabah.
Qadın başını əllərinin arasında həbs etdi,
fikirləri uzaqlara getdi.
Yorğunluğunu soyunub
özü də
getmək istədi qadın.
Uzaqlara getmək istədi...

65