"Açıq Kitab" elektron kitabxana nəşr olunacaq kitabların onlayn oxu versiyasını oxuculara təqdim etməyə davam edir

Azərbaycan Respublikasının Nazirlər Kabineti yanında Tərcümə Mərkəzinin "Açıq Kitab" elektron kitabxanası gənclərin mütaliəyə marağının artırılması məqsədi ilə Tərcümə Mərkəzinin yaxın vaxtlarda nəşr olunacaq kitablarının onlayn versiyasını oxuculara təqdim etməyə davam edir.

Bu dəfə virtual kitabxanamız Adolfo Bio Kasaresin “Morelin ixtirası” adlı kitabını oxucuların ixtiyarına buraxır.

Hekayə və qısa romanlar ustası kimi şöhrət qazanmış Adolfo Bio Kasares (1914-1999) iti zəkası, qələminin satirik ruhu və özünəməxsus təxəyyülü sayəsində yaratdığı yüksək səviyyəli ədəbiyyat inciləri ilə oxucuların qəlbinə yol tapmışdır. “Morelin ixtirası” romanı (1940) ilə zəngin ədəbi irsinin əsasını qoyan yazıçı, həmçinin “Qaçış planı” (roman, 1945), “Qəhrəmanların xəyalı” (roman, 1954), “Donuz müharibəsinin gündəliyi” (roman, 1969), “Günəş altında yatmaq” (roman, 1973), “La Platada  bir fotoqrafın macərası” (roman, 1985) əsərlərinin və bir çox hekayə toplusunun müəllifidir. Yaxın dostu, böyük Argentina yazıçısı Xorxe Luis Borxeslə ispandilli ədəbiyyatın məcrasını kökündən dəyişən ədəbi birlik yaratmış Kasares 1990-cı ildə Servantes Ədəbiyyat Mükafatına layiq görülüb.

Kitabı dilimizə Emin Ələsgərov tərcümə edib.

Oxucular www.achiqkitab.az saytının "Tərcümə Mərkəzinin kitabları” bölməsinə daxil olmaqla kitabın mütaliəsinə başlaya bilərlər.